രാഹുലിനെ പ്രധാനമന്ത്രി സ്ഥാനാർത്ഥിയായി അംഗീകരിച്ചില്ലെങ്കിൽ ടിവികെ മന്ത്രിസഭയിൽ നിന്ന് രാജിവയ്ക്കുമെന്ന് കോൺഗ്രസ്

2029 ലെ പൊതുതെരഞ്ഞെടുപ്പിൽ രാഹുൽ ഗാന്ധിയെ പ്രധാനമന്ത്രി സ്ഥാനാർത്ഥിയായി തമിഴക വെട്രി കഴകം (ടി.വി.കെ) പിന്തുണച്ചില്ലെങ്കിൽ കോൺഗ്രസ് മന്ത്രിമാർ സംസ്ഥാന മന്ത്രിസഭയിൽ നിന്ന് രാജിവെക്കുമെന്ന് തമിഴ്നാട് ടൂറിസം മന്ത്രി എസ്. രാജേഷ് കുമാർ മുന്നറിയിപ്പ് നൽകി. ശനിയാഴ്ച കന്യാകുമാരി വെസ്റ്റ് ജില്ലാ കോൺഗ്രസ് കമ്മിറ്റി പ്രസിഡന്റായി ചുമതലയേറ്റ ജോർജ് റോബിൻസന്റെ സ്ഥാനാരോഹണ ചടങ്ങിൽ സംസാരിക്കവെയാണ്, 2029 ൽ രാഹുൽ ഗാന്ധി ഇന്ത്യയുടെ പ്രധാനമന്ത്രിയാകുമെന്ന് രാജേഷ് കുമാർ വ്യക്തമാക്കിയത്.
1967 ന് ശേഷം ആദ്യമായി കോൺഗ്രസിനെ തമിഴ്നാട് മന്ത്രിസഭയിലേക്ക് തിരിച്ചെത്തിച്ച ടി.വി.കെ നേതൃത്വത്തിലുള്ള മുന്നണിക്ക് അതീവ നിർണായകമായ ഒരു ഘട്ടത്തിലാണ് ഈ മുന്നറിയിപ്പ് വന്നിരിക്കുന്നത്. മുഖ്യമന്ത്രി സി. ജോസഫ് വിജയ് നേതൃത്വം നൽകുന്ന സർക്കാരിൽ കോൺഗ്രസിന് രണ്ട് മന്ത്രിസ്ഥാനങ്ങളാണുള്ളത്. 234 അംഗ നിയമസഭയിൽ 118 എന്ന കേവലഭൂരിപക്ഷം തികയ്ക്കാൻ കഴിയാതെ 108 സീറ്റുകൾ നേടിയാണ് 2026 ലെ തമിഴ്നാട് നിയമസഭാ തെരഞ്ഞെടുപ്പിൽ ടി.വി.കെ ഏറ്റവും വലിയ ഒറ്റക്കക്ഷിയായി മാറിയത്. തുടർന്ന് കോൺഗ്രസിന്റെയും മറ്റ് കക്ഷികളുടെയും പിന്തുണയോടെ പാർട്ടി സഖ്യസർക്കാർ രൂപീകരിക്കുകയും വിജയ് മുഖ്യമന്ത്രിയായി ചുമതലയൽക്കുകയും ചെയ്തു.
ഡി.എം.കെ സർക്കാരുകൾക്ക് പുറത്തുനിന്ന് പിന്തുണ നൽകിയ കാലയളവുകൾ ഉൾപ്പെടെ, 1967 മുതൽ തമിഴ്നാട് സർക്കാരിന്റെ ഭാഗമല്ലാതിരുന്ന കോൺഗ്രസ് മന്ത്രിസഭയിലേക്ക് തിരിച്ചെത്തിയത് വലിയൊരു രാഷ്ട്രീയ മാറ്റമായിരുന്നു. 2029 ലെ ലോക്സഭാ തെരഞ്ഞെടുപ്പിൽ വിജയ്‌യെ പ്രധാനമന്ത്രി സ്ഥാനാർത്ഥിയായി ഉയർത്തിക്കാട്ടാൻ ടി.വി.കെ നേതാക്കൾ നടത്തുന്ന ശ്രമങ്ങൾക്കിടയിലാണ് രാജേഷ് കുമാറിന്റെ പരാമർശം. രാജ്യത്തെ ഉന്നതമായ പദവിയിൽ തമിഴ്നാട്ടിൽ നിന്നുള്ള ഒരു നേതാവ് എത്തണമെന്ന് പൊതുമരാമത്ത് വകുപ്പ് മന്ത്രി അധവ് അർജുന ഇതിനുമുമ്പ് വ്യക്തമാക്കിയിരുന്നു. പ്രധാനമന്ത്രി നരേന്ദ്ര മോഡിക്കും രാഹുൽ ഗാന്ധിക്കും പിന്നിൽ പ്രധാനമന്ത്രി സ്ഥാനത്തേക്ക് മുൻനിരയിലുള്ളവരുടെ പട്ടികയിൽ വിജയ്‌യുടെ പേരും ഒരു സർവേ ഉൾപ്പെടുത്തിയതിനെ തുടർന്ന് ഈ ചർച്ചകൾക്ക് കൂടുതൽ വേഗത കൈവന്നിരുന്നു.