ಬೆಂಗಳೂರಿಗೆ ಬಂತು BMTC 'ಚಕ್ರ': ಲಕ್ಷಾಂತರ ಮಂದಿ ವರ್ಷಗಳ ಕನಸು ನನಸಾಯ್ತು- ರೂಟ್​ ಹೀಗಿದೆ

ಬೆಂಗಳೂರಿನಲ್ಲಿ ಎಷ್ಟೇ ನಮ್ಮ ಮೆಟ್ರೋ ಇದ್ದರೂ, ಪ್ರತಿ ಮನೆಯಲ್ಲಿಯೂ ಕಾರು, ಬೈಕುಗಳು ಇದ್ದರೂ, ರಸ್ತೆ ವಿಸ್ತರಣೆ, ಫ್ಲೈ ಓವರ್​, ಅಂಡರ್​ಪಾಸ್​ ಮಾಡಿದ್ರೂ, ಪ್ರತಿನಿತ್ಯ ಉದ್ಯೋಗ ಅರಸಿ ಬರುವವರ ಮುಂದೆ ಇವೆಲ್ಲವೂ ಠುಸ್​ ಆಗುವುದು ಇದೆ. ಬೆಂಗಳೂರು ಬೆಳೆಯುತ್ತಿದ್ದಂತೆಯೇ ಕೆಲವು ಕಡೆಗಳಲ್ಲಿ ಸರಿಯಾದ ವಾಹನ ಸೌಕರ್ಯಗಳೂ ಇಲ್ಲದೇ ಪ್ರಯಾಣಿಕರು ಪರದಾಡುವ ಸ್ಥಿತಿ ಇದೆ. ಇದೀಗ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (BMTC) ಚಕ್ರ ಎನ್ನುವ ಹೊಸ ಬಸ್​ ಅನ್ನು ರಸ್ತೆಗೆ ಬಿಡಲಿದೆ. ಇದೇ 15ರಂದು ಈ ಹೊಸ ಬಸ್​ ಸಂಚಾರ ಆರಂಭವಾಗಲಿದ್ದು, ಲಕ್ಷಾಂತರ ಜನರ ಬಹಳ ವರ್ಷಗಳ ಕನಸು ಈಡೇರಲಿದೆ.

ಈ ಬಸ್​ ರೂಟ್​ ಜಿಗಣಿ, ಆನೇಕಲ್ ಮತ್ತು ಚಂದಾಪುರ ಪ್ರದೇಶದ ನಿವಾಸಿಗಳಿಗೆ ವರದಾನವಾಗಲಿದೆ. ಇದಾಗಲೇ ನಮ್ಮಮೆಟ್ರೋ ಎಲಕ್ಟ್ರಾನಿಕ್​ ಸಿಟಿಯ ಸಮೀಪ ವಿಸ್ತರಣೆ ಆಗಿದ್ದರೂ, ಬಸ್​ಗಾಗಿ ಲಕ್ಷಾಂತರಮಂದಿ ಕಾಯುತ್ತಿದ್ದರು. ಅವರ ಕನಡು ಈಗ ಈಡೇರಿದೆ. ತನ್ನ ಹೊಸ CHAKRA-3 ವೃತ್ತಾಕಾರದ ಸೇವೆ ಆರಂಭ ಆಗಲಿದೆ. 4 ಬಸ್‌ಗಳು ಈ ಮಾರ್ಗದಲ್ಲಿ ಕಾರ್ಯನಿರ್ವಹಿಸಲಿದ್ದು ಬೆಳಗ್ಗೆ 6:00 ರಿಂದ ಸಂಜೆ 7:10 ರವರೆಗೆ ದಿನಕ್ಕೆ 28 ಟ್ರಿಪ್‌ಗಳು ಸಂಚರಿಸಲಿವೆ. ಬಸ್ಸು, ಜಿಗಣಿ APC ಸರ್ಕಲ್‌ನಿಂದ ಹೊರಟು ಅದೇ ಸ್ಥಳಕ್ಕೆ (Place) ಮರಳುವ ಈ ವೃತ್ತಾಕಾರ ಮಾರ್ಗ ಈ ಪ್ರದೇಶದ ಸಾರಿಗೆ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡಲಿದೆ. CHAKRA-3 ಬಸ್ ಜಿಗಣಿ APC ಸರ್ಕಲ್‌ನಿಂದ ಹೊರಟು ಹರಗದ್ದೆ, ಇಂದ್ಲುವಾಡಿ ಕ್ರಾಸ್, ಆನೇಕಲ್, ಕಾರ್ಪುರ್ ಗೇಟ್, ಚಂದಾಪುರ ಮತ್ತು ರುಪೇಶ್ ಹೋಟೆಲ್ ಮೂಲಕ ಮತ್ತೆ ಜಿಗಣಿಗೆ ಮರಳುತ್ತದೆ.

ಪ್ರತಿ 20-30 ನಿಮಿಷಕ್ಕೊಮ್ಮೆ ಬಸ್ ಲಭ್ಯ ಇರುವುದಾಗಿ ಬಿಎಂಟಿಸಿ ಹೇಳಿದೆ. ಸಾಮಾನ್ಯ ನಾನ್-AC ದರದಲ್ಲಿ 6 ರೂಪಾಯಿಗಳಿಂದ ದರ ಆರಂಭವಾಗುತ್ತದೆ. ಜಿಗಣಿಯಿಂದ ಆನೇಕಲ್‌ಗೆ 15-25 ರೂಪಾಯಿ ಮತ್ತು ಚಂದಾಪುರದವರೆಗೆ 20-35 ರೂಪಾಯಿ ಟಿಕೆಟ್​ ಬೆಲೆ ನಿಗದಿ ಮಾಡಲಾಗಿದೆ. 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಉಚಿತ, ಮಕ್ಕಳಿಗೆ ಅರ್ಧ ದರ, ವೃದ್ಧರಿಗೆ ರಿಯಾಯಿತಿ ಮತ್ತು ದಿವ್ಯಾಂಗರಿಗೆ ವಿಶೇಷ ಸೌಲಭ್ಯ ಲಭ್ಯ ಇರುವುದಾಗಿ ಬಿಎಂಟಿಸಿ ಹೇಳಿದೆ.