സ്വര്‍ണവിലയിലെ നിലവിലെ വീഴ്ച കാര്യമാക്കേണ്ടെന്ന് മൊണാര്‍ക്ക് പിഎംഎസ് റിപ്പോര്‍ട്ട്. വിപണിയില്‍ അനുകൂലമായ സാഹചര്യമുണ്ടായാല്‍ സ്വര്‍ണവില ഔണ്‍സിന് 5,000-5,600 ഡോളര്‍ വരെയും വെള്ളിയുടെ വില 95-120 ഡോളര്‍ വരെയും ഉയര്‍ന്നേക്കാമെന്നാണ് ഈ റിപ്പോര്‍ട്ടില്‍ അവകാശപ്പെടുന്നത്. ഇത്തരം സാഹചര്യമുണ്ടാകാന്‍ 25 ശതമാനം സാധ്യതയാണുള്ളത് എന്നും റിപ്പോര്‍ട്ട് വ്യക്തമാക്കുന്നു.
ഒരു ഔണ്‍സ് എന്നാല്‍ 28.3 ഗ്രാം ആണ്. ഈ റിപ്പോര്‍ട്ട് പ്രകാരം വില ഔണ്‍സിന് 5,000-5,600 ഡോളറിലേക്ക് എത്തിയാല്‍ ഇന്ത്യയില്‍ വില ഗ്രാമിന് 17000 രൂപ മുതല്‍ 19000 രൂപ വരെ എത്തിയേക്കാം. തൊഴില്‍ വിപണിയിലെ മാന്ദ്യം മൂലം ഫെഡറല്‍ റിസര്‍വ് റിപ്പോ നിരക്കുകള്‍ കുറയ്ക്കാന്‍ നിര്‍ബന്ധിതരാകുന്നതും റിയല്‍ യീല്‍ഡ് നിരക്കുകളില്‍ മാറ്റം വരുന്നതും ഈ അനുകൂല സാഹചര്യത്തിന്റെ ഭാഗമായി കണക്കാക്കുന്നുവെന്ന് മൊണാര്‍ക്ക് പിഎംഎസ് തയ്യാറാക്കിയ റിപ്പോര്‍ട്ട് പറയുന്നു.
ഈ അനുകൂല സാഹചര്യം യാഥാര്‍ത്ഥ്യമാകണമെങ്കില്‍, വിലയേറിയ ലോഹങ്ങളിലേക്ക് സ്ഥാപനതലത്തിലുള്ള നിക്ഷേപ മാറ്റം വീണ്ടും സജീവമാകുകയും, വെള്ളിയുടെ ലഭ്യതയില്‍ കുറവ് അനുഭവപ്പെടുകയും വേണം. 55 ശതമാനം സാധ്യതയുള്ള അടിസ്ഥാന സാഹചര്യ പ്രകാരം, 2026-ന്റെ അവസാനത്തോടെ സ്വര്‍ണവില ഔണ്‍സിന് 4,300-4,700 ഡോളര്‍ എന്ന നിലയിലും വെള്ളിയുടെ വില 70-85 ഡോളര്‍ എന്ന നിലയിലും എത്താന്‍ സാധ്യതയുണ്ട്.
സെപ്തംബര്‍ വരെ യുഎസ് ഫെഡറല്‍ റിസര്‍വ് പലിശ നിരക്കുകളില്‍ മാറ്റം വരുത്താതിരിക്കുക, ഊര്‍ജ്ജ വില സാധാരണ നിലയിലാകുക, റിയല്‍ യീല്‍ഡ് നിരക്കുകള്‍ സ്ഥിരത കൈവരിക്കുക, കേന്ദ്ര ബാങ്കുകള്‍ പ്രതിവര്‍ഷം ഏകദേശം 1,000 ടണ്‍ (പ്രതിപാദം 250 ടണ്‍ വീതം) എന്ന തോതില്‍ സ്വര്‍ണശേഖരണം തുടരുക എന്നിവയാണ് ഈ സാഹചര്യത്തില്‍ കണക്കാക്കുന്നത്.
20 ശതമാനം സാധ്യതയുള്ള വിപണിക്ക് പ്രതികൂലമായ സാഹചര്യം പ്രകാരം, സെപതംബറില്‍ ഫെഡറല്‍ റിസര്‍വ് പലിശനിരക്ക് വര്‍ധിപ്പിക്കുകയും, എണ്ണവില ഇനിയും കുറയുകയും, പണപ്പെരുപ്പം കുറയുന്നതിനൊപ്പം ഉപഭോക്തൃ ആവശ്യകതയില്‍ കുറവുണ്ടാകുകയും ചെയ്താല്‍ സ്വര്‍ണവില ഔണ്‍സിന് 3,400-3,900 ഡോളറിലേക്കും വെള്ളിയുടെ വില 45-55 ഡോളറിലേക്കും താഴ്‌ന്നേക്കാം.
'പ്രധാന വെല്ലുവിളി 10 വര്‍ഷത്തെ ടിപ്‌സ് റിയല്‍ യീല്‍ഡ് ആണ്. 2.41 ശതമാനത്തില്‍ നില്‍ക്കുന്ന ഈ നിരക്ക്, സ്വര്‍ണം പോലുള്ള പലിശ വരുമാനം നല്‍കാത്ത ആസ്തികള്‍ക്ക് ശക്തമായ ഒരു ബദല്‍ നിക്ഷേപ നേട്ടമായി തുടരുന്നു,' റിപ്പോര്‍ട്ട് പറയുന്നു. വെള്ളിയുടെ കാര്യത്തില്‍ വിതരണ-ആവശ്യകത ഘടകങ്ങളും അനുകൂലമാണ്. തുടര്‍ച്ചയായ ആറാം വര്‍ഷവും വിതരണത്തേക്കാള്‍ കൂടുതല്‍ ആവശ്യകതയെന്ന സ്ഥിതി തുടരുന്നു.
2021 മുതല്‍ നിലവിലുള്ള ശേഖരത്തില്‍ നിന്ന് 762 ദശലക്ഷം ഔണ്‍സ് വെള്ളി ഉപയോഗിച്ചുതീര്‍ത്തു. കൂടാതെ ഖനികളില്‍ നിന്നുള്ള ഉല്‍പ്പാദനം കഴിഞ്ഞ ഒരു ദശാബ്ദമായി കാര്യമായ മാറ്റമില്ലാതെ തുടരുകയും ചെയ്യുന്നു എന്ന് റിപ്പോര്‍ട്ട് കൂട്ടിച്ചേര്‍ത്തു. കോമെക്‌സിലെ പേപ്പര്‍ ക്ലെയിമുകള്‍ രജിസ്റ്റര്‍ ചെയ്ത ഭൗതിക ശേഖരത്തിന്റെ ഏകദേശം 5.6 മടങ്ങോളം വരുന്ന സാഹചര്യത്തില്‍, ആവശ്യം വര്‍ധിച്ചാല്‍ ഭൗതിക ലഭ്യതയിലുള്ള കുറവ് വിലക്കയറ്റത്തിന് ആക്കം കൂട്ടുമെന്ന് കമ്പനി പ്രവചിച്ചു
'സ്വര്‍ണ-വെള്ളി അനുപാതവും സാധാരണ നിലയിലായിട്ടുണ്ട്. ജനുവരിയിലെ ഉയര്‍ന്ന നിരക്കായ 46-ല്‍ നിന്ന് നിലവില്‍ 69-ലേക്കാണ് ഇത് ഉയര്‍ന്നത്. ഇത് 21-ാം നൂറ്റാണ്ടിലെ ശരാശരിക്ക് അടുത്തുള്ള നിരക്കാണ്,' റിപ്പോര്‍ട്ട് ചൂണ്ടിക്കാട്ടി. നേരത്തെയുണ്ടായിരുന്ന മികച്ച പ്രകടനത്തില്‍ നിന്ന് വെള്ളി പിന്നോട്ട് പോയെന്നും, ഇപ്പോള്‍ സ്വര്‍ണവുമായി താരതമ്യം ചെയ്യുമ്പോള്‍ ഇതിന് വില കുറവാണെന്നും റിപ്പോര്‍ട്ട് കൂട്ടിച്ചേര്‍ത്തു. R