നിയമനിർമ്മാണ സഭകളിലെ വനിതാ സംവരണം കാലഘട്ടത്തിന്റെ ആവശ്യം; സ്ത്രീപുരോഗതി രാജ്യത്തിന്റെ വളർച്ചയ്ക്ക് അനിവാര്യമെന്ന് പ്രധാനമന്ത്രി

ന്യൂഡൽഹി: ലോക്സഭയിലും നിയമസഭകളിലും സ്ത്രീകൾക്ക് 33 ശതമാനം സംവരണം ഉറപ്പാക്കുന്ന 'നാരിശക്തി വന്ദൻ അധിനിയം' നടപ്പിലാക്കുന്നതിൽ ഇനി കാലതാമസം പാടില്ലെന്ന് പ്രധാനമന്ത്രി നരേന്ദ്ര മോദി. ഒരു പ്രമുഖ മാധ്യമത്തിൽ എഴുതിയ ലേഖനത്തിലാണ് പ്രധാനമന്ത്രി തന്റെ നിലപാട് വ്യക്തമാക്കിയത്. ഇന്ത്യയിലെ കോടിക്കണക്കിന് സ്ത്രീകളുടെ അഭിലാഷങ്ങളുടെ പ്രതിഫലനമാണ് ഈ ബില്ലെന്ന് അദ്ദേഹം പറഞ്ഞു.

സ്ത്രീകൾ പുരോഗതി കൈവരിക്കുമ്പോഴാണ് ഒരു സമൂഹം പുരോഗമിക്കുന്നതെന്ന തത്വം നമ്മുടെ സംസ്‌കാരത്തിന്റെ ഭാഗമാണ്. ശാസ്ത്രം, സാങ്കേതികവിദ്യ, സംരംഭകത്വം, കായികം, കല തുടങ്ങി എല്ലാ മേഖലകളിലും ഇന്ത്യൻ സ്ത്രീകൾ ഇന്ന് മുൻപന്തിയിലുണ്ട്. എന്നാൽ രാഷ്ട്രീയത്തിലും നിയമനിർമ്മാണ സഭകളിലും അവർക്ക് അർഹമായ പ്രതിനിധ്യം ലഭിക്കാത്തത് നിർഭാഗ്യകരമാണ്. സ്ത്രീകൾ ഭരണരംഗത്ത് എത്തുമ്പോൾ അവർ നൽകുന്ന ഉൾക്കാഴ്ചകൾ ഭരണത്തിന്റെ ഗുണനിലവാരം വർദ്ധിപ്പിക്കുമെന്നും പ്രധാനമന്ത്രി അഭിപ്രായപ്പെട്ടു.

2029-ലെ ലോക്‌സഭാ തിരഞ്ഞെടുപ്പിലും അതിന് ശേഷം വരുന്ന നിയമസഭാ തിരഞ്ഞെടുപ്പുകളിലും വനിതാ സംവരണം നിലവിൽ വരേണ്ടത് അത്യാവശ്യമാണ്. പതിറ്റാണ്ടുകളായി ഈ വിഷയത്തിൽ ചർച്ചകൾ നടന്നിട്ടുണ്ടെങ്കിലും പലപ്പോഴും ബില്ലുകൾ വെളിച്ചം കണ്ടിരുന്നില്ല. 2023 സെപ്റ്റംബറിൽ പാർലമെന്റ് ഐക്യകണ്ഠേന പാസാക്കിയ 'നാരിശക്തി വന്ദൻ അധിനിയം' തന്റെ ജീവിതത്തിലെ ഏറ്റവും സവിശേഷമായ നിമിഷങ്ങളിലൊന്നാണെന്ന് മോദി അനുസ്മരിച്ചു.