ആഗോള വേദികളിൽ മലയാളികളുടെ സാന്നിധ്യവും കഴിവും തെളിയിക്കുന്ന മറ്റൊരു അഭിമാനകരമായ മുഹൂർത്തമാണിത്
'മെയ്ഡ് ഇൻ ഇരിങ്ങാലക്കുട' ജപ്പാനിൽ; ഏഷ്യൻ ഗെയിംസ് വേദികളിൽ അഭിമാനമായി മലയാളിത്തിളക്കം
ഏതൊരു ഉൽപന്നം വാങ്ങുമ്പോഴും അത് 'മെയ്ഡ് ഇൻ ജപ്പാൻ' ആണോ എന്ന് നോക്കിയിരുന്ന കാലമുണ്ടായിരുന്നു. എന്നാൽ ജപ്പാനിൽ നടക്കുന്ന ഏഷ്യൻ ഗെയിംസിന്റെ ആവശ്യങ്ങൾക്കായി ഉപയോഗിക്കുന്ന ട്രാൻസ്ഫോമറുകൾ ഇപ്പോൾ 'മെയ്ഡ് ഇൻ ഇന്ത്യ'യാണ്-അതും നമ്മുടെ സ്വന്തം ഇരിങ്ങാലക്കുടയിൽ വേരുകളുള്ള കമ്പനിയുടേത്
ഏഷ്യൻ ഗെയിംസിന്റെ 56 വേദികളിലായി 3 കിലോവാട്ട് മുതൽ 100 കിലോവാട്ട് വരെയുള്ള ട്രാൻസ്ഫോമറുകളാണ് ഉപയോഗിച്ചിരിക്കുന്നത്. ഇതിൽ ഭൂരിഭാഗവും നിർമിച്ചിരിക്കുന്നത് ഇരിങ്ങാലക്കുട കേന്ദ്രമായ 'ട്രോജൻ ട്രാൻസ്ഫോമേഴ്സിന്റെ' ഗുജറാത്തിലെ പ്ലാന്റിലാണ്.
ഫ്രഞ്ച് കമ്പനിയായ 'ഗ്ലോബൽ ഇവന്റ്സി'ന്റെ ദുബായിലെ സബ്സിഡിയറിയായ 'ഫ്ലോ' എന്ന സ്ഥാപനമാണ് ഗെയിംസിന്റെ നടത്തിപ്പു പങ്കാളികൾ. ഈ സ്ഥാപനത്തിന്റെ ഭാഗമായ ഒട്ടേറെ മലയാളികൾ ഗെയിംസിന്റെ അണിയറ പ്രവർത്തനങ്ങൾക്കായി ജപ്പാനിലെ നഗോയയിലുണ്ട്. ടെക്നീഷ്യൻമാരായ കണ്ണൂർ ഇരിട്ടി സ്വദേശി ജോമോൻ ജോസഫ്, അങ്കമാലി സ്വദേശി ജോബി മുണ്ടാടൻ, കോഴിക്കോട് സ്വദേശി ബോണി ജോ, ചാലക്കുടി സ്വദേശി സന്ദീപ് ശശിധരൻ തുടങ്ങിയ പ്രമുഖരെല്ലാം ഗെയിംസിന്റെ വിജയത്തിനായി സജീവമായി രംഗത്തുണ്ടെന്ന് മനോരമ റിപ്പോർട്ട് ചെയ്യുന്നു.
അതിനിടയിൽ, അന്താരാഷ്ട്ര തലത്തിലുള്ള ചില പ്രതിസന്ധികളും ഗെയിംസിന്റെ മുന്നൊരുക്കങ്ങളെ ബാധിച്ചിരുന്നു. യുഎസ്- ഇറാൻ സംഘർഷത്തെത്തുടർന്ന് ഹോർമൂസ് കടലിടുക്ക് അടച്ചതുമൂലം ഗെയിംസിനായി എത്തിക്കേണ്ടിയിരുന്ന പല സാധനങ്ങളും യഥാസമയം എത്താതിരുന്നത് വെല്ലുവിളിയായി. എന്നാൽ ഇന്ത്യയിൽനിന്ന് സാധനങ്ങൾ എത്തിക്കുന്നത് താരതമ്യേന എളുപ്പമായതുകൊണ്ട് പിന്നീട് അതിനെ ആശ്രയിക്കുകയായിരുന്നു. നാനൂറോളം വരുന്ന 500 കെവി ജനറേറ്ററുകൾ മാത്രമാണ് ഗെയിംസിന്റെ വിവിധ ആവശ്യങ്ങൾക്കായി ഇവിടെ ഉപയോഗിക്കുന്നത്. ആഗോള വേദികളിൽ മലയാളികളുടെ സാന്നിധ്യവും കഴിവും തെളിയിക്കുന്ന മറ്റൊരു അഭിമാനകരമായ മുഹൂർത്തമാണിത്.
