'ന്യായീകരിക്കാനാവില്ല'; 3 ഇന്ത്യൻ നാവികരുടെ മരണം: യുഎസ് സ്റ്റേറ്റ് സെക്രട്ടറിയെ നേരിട്ട് വിളിച്ച് പ്രതിഷേധം അറിയിച്ച് ജയശങ്കർ
ന്യൂഡൽഹി: ഒമാൻ ഉൾക്കടലിൽ എണ്ണ ടാങ്കറിന് നേരെ യുഎസ് നാവികസേന നടത്തിയ ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ട സംഭവത്തിൽ അമേരിക്കയെ ശക്തമായ നയതന്ത്ര പ്രതിഷേധം അറിയിച്ച് ഇന്ത്യ. വിഷയം ഗുരുതരമായി എടുത്ത ഇന്ത്യൻ വിദേശകാര്യ മന്ത്രി എസ്. ജയശങ്കർ, യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി നേരിട്ട് സംസാരിച്ച് ഇന്ത്യയുടെ കടുത്ത എതിർപ്പ് രേഖപ്പെടുത്തി.
താൻ മാർക്കോ റൂബിയോയുമായി സംസാരിച്ച വിവരം ജയശങ്കർ എക്സിലൂടെ (ട്വിറ്റർ) പങ്കുവെച്ചു. "ഗൾഫ് മേഖലയിൽ യുഎസ് നാവികസേന നടത്തിയ ആക്രമണത്തിൽ ഇന്ത്യയുടെ ശക്തമായ പ്രതിഷേധം ആവർത്തിച്ചു അമേരിക്കയെ അറിയിച്ചു. വാണിജ്യ കപ്പലുകൾക്കെതിരായ ഇത്തരം മാരകമായ നടപടികൾ ഒരുതരത്തിലും ന്യായീകരിക്കാനാവില്ല."- ജയശങ്കർ വ്യക്തമാക്കി.
ആക്രമണത്തെത്തുടർന്ന് കാണാതായ മൂന്ന് ക്രൂ അംഗങ്ങളുടെ മരണം സ്ഥിരീകരിച്ചതിന് പിന്നാലെയാണ് ഇന്ത്യയുടെ അടിയന്തര നയതന്ത്ര ഇടപെടൽ. നാവികരുടെ മരണം അങ്ങേയറ്റം ദുരിതപൂർണമാണെന്ന് കേന്ദ്ര തുറമുഖ-ഷിപ്പിങ് മന്ത്രി സർബാനന്ദ സോനോവാൾ പറഞ്ഞു. ഡെക്ക് കേഡറ്റ് ആദിത്യ ശർമ്മ, എഞ്ചിൻ ഫിറ്റർ ശിവാനന്ദ് ചൗരസ്യ, ചീഫ് എഞ്ചിനീയർ പട്നാല സുരേഷ് എന്നിവരാണ് കൊല്ലപ്പെട്ടത്. ഇവരുടെ മൃതദേഹങ്ങൾ കണ്ടെത്തി തിരിച്ചറിഞ്ഞിട്ടുണ്ട്.
പലാവു (Palau) പതാക ഘടിപ്പിച്ച സെറ്റെബെല്ലോ എന്ന എണ്ണ ടാങ്കറിന് നേരെയാണ് ആക്രമണമുണ്ടായത്. കപ്പലിൽ ഉണ്ടായിരുന്ന 28 ജീവനക്കാരിൽ 24 പേരും ഇന്ത്യൻ പൗരന്മാരായിരുന്നു. ബാക്കി നാല് പേർ വിദേശികളാണ് (രണ്ട് പാകിസ്ഥാൻ സ്വദേശികൾ, ഒരു ഉക്രെയ്ൻ സ്വദേശി, ഒരു റഷ്യൻ സ്വദേശി). സംഭവത്തിന് ശേഷം 21 ഇന്ത്യൻ നാവികരെ സുരക്ഷിതമായി രക്ഷപ്പെടുത്തിയിട്ടുണ്ട്. രക്ഷപ്പെടുത്തിയ ജീവനക്കാരെ എത്രയും വേഗം നാട്ടിലെത്തിക്കാനും, മരിച്ചവരുടെ മൃതദേഹങ്ങൾ വിട്ടുനൽകാനുമുള്ള നടപടികൾ വേഗത്തിലാക്കാൻ ഉദ്യോഗസ്ഥർക്ക് നിർദ്ദേശം നൽകിയതായി സോനോവാൾ അറിയിച്ചു.
കപ്പലിന് നേരെ ആക്രമണം നടത്തിയ കാര്യം യുഎസ് സൈന്യം സമ്മതിച്ചിട്ടുണ്ട്. യുഎസ് നാവിക സേനയുടെ നിർദ്ദേശങ്ങൾ പാലിക്കാൻ കപ്പൽ തയ്യാറാകാതിരുന്നതാണ് നടപടിക്ക് കാരണമെന്ന് യുഎസ് സെൻട്രൽ കമാൻഡ് (CENTCOM) അറിയിച്ചു. അമേരിക്കൻ ഉപരോധം ലംഘിച്ച് ഇറാനിൽ നിന്ന് എണ്ണ കടത്താനാണ് ടാങ്കർ ശ്രമിച്ചതെന്നും, യുഎസ് വിമാനത്തിൽ നിന്ന് കപ്പലിന് നേരെ വെടിയുതിർത്താണ് അതിന്റെ പ്രവർത്തനം നിർത്തിവെച്ചതെന്നും സെൻട്രോം പ്രസ്താവനയിലൂടെ വാദിച്ചു.
അമേരിക്കയുടെ ഈ നടപടിയെ ഇന്ത്യ ശക്തമായി വിമർശിച്ചു. കപ്പലിൽ ഭൂരിഭാഗവും ഇന്ത്യൻ പൗരന്മാരായിരുന്നുവെന്നും അവർ വാണിജ്യപരമായ ആവശ്യങ്ങൾക്കാണ് അവിടെയുണ്ടായിരുന്നതെന്നും ഇന്ത്യ ചൂണ്ടിക്കാട്ടി. പശ്ചിമേഷ്യയിൽ നിലനിൽക്കുന്ന സംഘർഷങ്ങളുടെ പശ്ചാത്തലത്തിൽ വാണിജ്യ കപ്പലുകൾക്ക് നേരെ ഉണ്ടാകുന്ന ഇത്തരം ആക്രമണങ്ങൾ വലിയ ആശങ്കയുണ്ടാക്കുന്നതാണെന്ന് ഇന്ത്യൻ വിദേശകാര്യ മന്ത്രാലയം വ്യക്തമാക്കി.