மீனாட்சி நடராஜன் விவகாரத்தில் தேர்தல் அதிகாரியின் முடிவு சட்டப்படி தவறானது: காங்கிரஸ்
புதுடெல்லி: மாநிலங்களவைத் தேர்தலில் காங்கிரஸ் சார்பில் போட்டியிட்ட மீனாட்சி நடராஜனின் மனுவை நிராகரித்தது சட்டப்படி தவறு என்று இந்திய தேர்தல் ஆணையத்திடம் காங்கிரஸ் கட்சி முறையிட்டுள்ளது. மாநிலங்களவையில் காலியாக உள்ள 27 இடங்களுக்கு ஜூன் 18-ம் தேதி தேர்தல் நடைபெற உள்ளது. இதில் மத்திய பிரதேசத்தில் 3 இடங்களுக்கு தேர்தல் நடைபெறுகிறது. 230 உறுப்பினர் கொண்ட மாநில பேரவையில் ஒரு வேட்பாளர் வெற்றி பெற 58 வாக்குகள் தேவை. பாஜகவிடம் 164, காங்கிரஸிடம் 64 எம்எல்ஏக்கள் உள்ளனர். இதனால் பாஜக 2 இடங்களிலும், காங்கிரஸ் ஓரிடத்திலும் எளிதாக வெல்ல முடியும். பாஜக பொதுச் செயலாளர் தருண் சக், மாநிலசெயலாளர் ரஜ்னீஷ் அகர்வால் ஆகியோர் வேட்பாளர்களாக உள்ளனர். பாஜகவிடம் 48 வாக்குகள் உபரியாக இருப்பதால் 3-வது வேட்பாளராக மகேஷ் கெவத் அறிவிக்கப்பட்டார். காங்கிரஸ் சார்பில் தமிழகத்தைப் பூர்விகமாகக் கொண்ட மீனாட்சி நடராஜன் வேட்பு மனு தாக்கல் செய்திருந்தார். ஆனால், ஹைதராபாத் நீதிமன்றத்தில் அவர் மீது நிலுவையில் உள்ள குற்ற வழக்கு பற்றி குறிப்பிடப்படாததால் அவரது வேட்பு மனு நிராகரிக்கப்பட்டது. எனவே, பாஜகவின் 3 வேட்பாளர்களும் போட்டியின்றி தேர்வு செய்யப்பட உள்ளனர்.
இந்நிலையில், இந்த விவகாரம் தொடர்பாக புதுடெல்லியில் உள்ள தலைமைத் தேர்தல் ஆணையர் மற்றும் பிற ஆணையர்களிடம் காங்கிரஸ் சார்பில் முறையிடப்பட்டது. காங்கிரஸ் அமைப்பு பொதுச் செயலாளர் கே.சி.வேணுகோபால், அபிஷேக் மனு சிங்வி, விவேக் தங்கா, ரந்தீப் சிங் சுர்ஜேவாலா, ஜெயராம் ரமேஷ், பூபேஷ் பெகல், தீபா தாஸ்முன்ஷி, மீனாட்சி நடராஜன் ஆகியோர் தேர்தல் ஆணையர்களைச் சந்தித்து தங்கள் தரப்பு விளக்கத்தை அளித்தனர். பின்னர் செய்தியாளர்களிடம் பேசிய அபிஷேக் மனு சிங்வி, “நாங்கள் தேர்தல் ஆணையத்திடம் விரிவான விளக்கத்தை அளித்தோம். தேர்தல் நடத்தும் அதிகாரி (ஆர்ஓ) தவறான, நியாயமற்ற உத்தரவை பிறப்பித்துள்ளார் என்பதை சந்தேகத்துக்கு அப்பாற்பட்ட முறையில் எடுத்துரைத்தோம். தேர்தல் ஆணையத்தின் மக்கள் பிரதிநிதித்துவச் சட்டத்தின் பிரிவு 33ஏ-ன்படி இரண்டு ஆண்டுகளுக்கு மேல் தண்டனை விதிக்கப்படக்கூடிய வழக்குகள் மற்றும் குற்றச்சாட்டுகள் முறையாக பதிவு செய்யப்பட்ட வழக்குகள் ஆகியவற்றில் மட்டுமே தகவல்களை வெளிப்படுத்த வேண்டும் என்று கூறப்பட்டுள்ளது.
மீனாட்சி நடராஜன் விவகாரத்தில், அவர் மீதான குற்றச்சாட்டு குறித்து ஏன் விசாரணை நடத்தக்கூடாது என்பதற்கு விளக்கம் கோரி மட்டுமே நோட்டீஸ் அனுப்பப்பட்டுள்ளது. அதாவது அந்த விவகாரம், விசாரணைக்கு எடுத்துக்கொள்ளப்படுவதற்கு முன்பே அவருக்கு நோட்டீஸ் அனுப்பப்பட்டுள்ளது. விசாரணைக்கு எடுத்துக்கொள்ளப்படாவிட்டால், சட்டப்படி அவர் மீது எந்த ஒரு குற்றவியல் வழக்கும் நிலுவையில் இல்லை என்றே அர்த்தம். ஒருவர் மீது மற்றொருவர் குற்றச்சாட்டை முன்வைப்பதாலேயே அது குற்றவியல் வழக்காக ஆகிவிடாது. விசாரணைக்கு எடுத்துக்கொள்ளப்படும் நிலையே இன்னும் வராத நிலையில் மீனாட்சி நடராஜனின் வேட்புமனுவை அவர்கள் நிராகரித்துள்ளனர். எனவே, இந்த விவகாரத்தில் தேர்தல் ஆணையம் உடனடியாக ஒரு முடிவை எடுக்க வேண்டும் என்று நாங்கள் கோரியுள்ளோம். வேட்புமனுவை திரும்பப் பெறும் நாளான இன்று நாங்கள் எங்கள் கோரிக்கையை வைத்துள்ளோம். போதுமான நேரம் உள்ளது. மீனாட்சி நடராஜனுக்கு எதிரான உத்தரவு என்பது சட்ட அடிப்படை அற்ற, சட்டவிரோதமான உத்தரவு. இது உடனடியாக ரத்து செய்யப்பட வேண்டும் என்று நாங்கள் கோரியுள்ளோம்” என தெரிவித்தார்.