சிஎஸ்கே தலைமைப் பயிற்சியாளராக ஜாகிர் கானின் பெயரைப் பரிந்துரைத்தார் தோனி
சிஎஸ்கே அணியை 5 முறை ஐபிஎல் சாம்பியன் ஆக்கியதில் முக்கியப் பங்கு வகித்த முன்னாள் தலைமைப் பயிற்சியாளர் ஸ்டீபன் பிளெமிங், இங்கிலாந்து டெஸ்ட் அணியின் தலைமைப் பயிற்சியாளர் பொறுப்பை ஏற்று சிஎஸ்கே அணியிலிருந்து ராஜினாமா செய்ததையடுத்து ஜாகிர் கான் சிஎஸ்கே அணியின் தலைமைப் பயிற்சியாளராக நியமிக்கப்பட்டுள்ளார். இதன் பின்னணியில் தோனியின் பங்கு அபரிமிதம் என்று கூறப்படுகிறது.
பல மாத ஆலோசனைகளுக்குப் பிறகு, 2027-ம் ஆண்டு சீசனில் சென்னை சூப்பர் கிங்ஸ் அணியின் தலைமை பயிற்சியாளராக ஜாகிர் கான் பொறுப்பேற்க உள்ளதாக திங்கள்கிழமை அறிவிக்கப்பட்டது. இந்த முடிவில் முன்னாள் கேப்டன் மகேந்திர சிங் தோனியின் ஆலோசனையும் முக்கிய பங்கு வகித்துள்ளதாகத் தெரியவந்துள்ளது.
இதுகுறித்து சிஎஸ்கே நிர்வாக இயக்குநர் காசி விஸ்வநாதன் கூறுகையில், “எங்களுடைய அனைத்து முடிவுகளையும் எம்.எஸ்.தோனியுடன் ஆலோசித்துதான் எடுக்கிறோம். ஜாகிர் கானின் பெயரை அவர்தான் முதலில் பரிந்துரைத்தார். அதன்பிறகு நிர்வாகம் ஜாகிரிடம் பேசி, அவரை சம்மதிக்க வைத்தது. எதிரணியின் ஆட்டத் திட்டங்களைப் புரிந்துகொள்வதில் ஜாகிர் சிறந்தவர். குறிப்பாக, அவரது தந்திரோபாயத் திறன் மிகவும் வலுவானது. ருதுராஜ் கெய்க்வாட் உள்ளிட்ட வீரர்கள் அவருடன் பணியாற்ற ஆர்வமாக உள்ளனர்” என்றார்.
5 முறை சாம்பியனான சிஎஸ்கே அணி, 2023-ல் கோப்பையை வென்ற பிறகு இதுவரை பிளே ஆஃப் சுற்றுக்கு முன்னேறவில்லை. குறிப்பாக, 2025-ம் ஆண்டு நடைபெற்ற மெகா ஏலத்தில் அணியின் சில முடிவுகள் எதிர்பார்த்த பலனை அளிக்காத நிலையில், அதன் தாக்கத்தை சிஎஸ்கே தொடர்ந்து சந்தித்து வருகிறது. பேட்டிங் துறையில் சில மாற்றங்கள் செய்யப்பட்டிருந்தாலும், அணியின் வீரர்கள் கூட்டணி இன்னும் முழுமையாக நிலைபெறவில்லை.
அடுத்த மெகா ஏலத்திற்கு இன்னும் ஓராண்டு மட்டுமே உள்ள நிலையில், தற்போது இருக்கும் வளங்களை அதிகபட்சமாகப் பயன்படுத்த வேண்டிய கட்டாயத்தில் சிஎஸ்கே உள்ளது. இந்தச் சூழலில் ஜாகிர் கான் அணிக்கு குறிப்பிடத்தக்க மாற்றத்தை ஏற்படுத்துவார் என்று நிர்வாகம் நம்புகிறது.
இதுகுறித்து காசி விஸ்வநாதன் மேலும் கூறுகையில், “வீரர்களுடன் சிறப்பாக இணைந்து பணியாற்றக்கூடிய ஒரு பயிற்சியாளர் எங்களுக்குத் தேவைப்பட்டது. அதற்கு ஜாகிர் சரியான தேர்வு. அவர் தொழில்நுட்ப ரீதியாக மிகவும் வலுவானவர். பந்துவீச்சுத் துறையில் நாங்கள் முன்னேற்றம் தேவை என்று கருதினோம். கலீல் அகமது, குர்ஜப்நீத் சிங் போன்ற வேகப்பந்து வீச்சாளர்களுக்கு ஜாகிர் உதவ முடியும்” என்றார்.
