రాజస్థాన్ మున్సిపల్ రిజల్ట్స్.. బీజేపీకి కాంగ్రెస్ గట్టి పోటీ.. సొంత ఇలాకాలో సీఎంకు షాక్..!
జైపూర్: రాజస్థాన్ మున్సిపల్ ఎన్నికల్లో అధికార బీజేపీ, ప్రతిపక్ష కాంగ్రెస్ హోరాహోరీగా తలపడ్డాయి. రెండు దశల్లో జరిగిన ఈ ఎన్నికల్లో బీజేపీ అత్యధిక స్థానాలను కైవసం చేసుకొని ముందంజలో నిలువగా అధికార పార్టీకి కాంగ్రెస్ గట్టి పోటీనిచ్చింది. మొత్తం 309 పురపాలక సంస్థలలోని 10,245 వార్డులకు ఎన్నికలు జరగగా.. 4,100 కి పైగా వార్డులలో బీజేపీ విజయం సాధించింది.
3,400కి పైగా వార్డులను కాంగ్రెస్ దక్కించుకుంది. ఇండిపెండెంట్లు ప్రధాన పార్టీలకు షాక్ ఇస్తూ దాదాపు 2,400కి పైగా స్థానాలను కైవసం చేసుకున్నారు. ఓట్ షేర్ పరంగా చూస్తే.. 309 పురపాలక సంస్థలలో పోలైన మొత్తం ఓట్లలో కాంగ్రెస్ 34.24 శాతం (36,35,952 ఓట్లు) సాధించగా.. బీజేపీ 35.18 శాతం (37,35,567 ఓట్లు) దక్కించుకుంది.
దీంతో బీజేపీ కేవలం 0.94 శాతం (99,615 ఓట్లు) స్వల్ప ఆధిక్యం సాధించడం గమనార్హం. మరోవైపు స్వతంత్ర అభ్యర్థులు మొత్తం 27.38 శాతం (29,06,787 ఓట్లు) ఓట్లతో గణనీయమైన వాటాను దక్కించుకున్నారు. నోటాకు 1.03 శాతం (1,09,523 ఓట్లు) ఓట్లు పడ్డాయి. ఓట్ల లెక్కింపు ప్రక్రియలో సాంకేతిక లోపాలు తలెత్తడంతో జోధ్పూర్ మున్సిపల్ కార్పొరేషన్, కోటా మున్సిపల్ కార్పొరేషన్, జైపూర్ మున్సిపల్ కార్పొరేషన్, సుకేత్ మున్సిపాలిటీలలో మేయర్, డిప్యూటీ మేయర్ ఎన్నికలను వాయిదా వేస్తున్నట్లు రాష్ట్ర ఎన్నికల సంఘం ప్రకటించింది.
